YANGA SASA MGUU SAWA, WACHEZAJI WAANZA KUSAINI MIKATABA.

Hali ya kikosi cha mabingwa wa Tanzania bara Yanga imekua ya kutia shaka kutokana na ukimya wa klabu hiyo katika suala la usajili msimu huu huku nyota zaidi ya 10 wa kikosi cha kwanza wakiwa wamemaliza mikataba yao.

Mashabiki wa Yanga wanaweza kuanza kupumua sasa baada ya viongozi wa klabu hiyo kuanza jitihada za kuwasainisha mikataba mipya wachezaji wao.

Pamoja na kumsajili beki wa kati Abdallah Haji 'Ninja' kutoka Taifa Jang'ombe hapo jana, taarifa za uhakika ambazo www.wapendasoka.com imezipata kutoka Yanga zinasema tayari wamemsainisha mkataba mpya beki wao wa kushoto Haji Mwinyi Mngwali  huku wakiendelea na mazungumzo na mlinda mlango wao namba moja Deogratias Munishi 'Dida' ambapo muda wowote kuanzia sasa nae anaweza kutia saini kandarasi ya kuendelea kukitumikia kikosi hicho.

Katibu mkuu wa Yanga Charles Boniface Mkwasa, amewataka Wanayanga watulie, akiwahakikishia kwamba watakua na sehemu kubwa ya kikosi chao cha msimu uliopita.