NYOSO AIBUKIA KAGERA SUGAR,WAPO PIA LUDOVIC,KASEJA NA MWALYANZI

Timu ya Kagera Sugar ya Misenyi mkoani Kagera imepiga kishindo kikubwa katika usajili kwa kuwasajili nyota saba kutoka vilabu mbalimbali vya ligi kuu na kuwaongeza mikataba wachezaji wao watatu ambao walikua wamemaliza.

Wachezaji walioongeza mikataba ni pamoja na mlinda mlango Juma Kaseja, Nahodha George Kavila pamoja na kijana Edward Christopher ambao wote wanesaini mikataba ya mwaka mmoja mmoja.

Wachezaji wapya waliosajiliwa mpaka sasa ni pamoja na Nahodha wa zamani wa Mbeya City ambaye amemaliza adhabu yake ya kufungiwa miaka miwili, Juma Said 'Nyoso' ambaye amesaini mkataba wa miaka miwili.

Wengine ni Peter Mwalyanzi ambaye alikua African Lyon kwa mkopo kutoka Simba. Huyu amesaini kandarasi ya mwaka mmoja pamoja na Abdalah Mguhi pia kutoka African Lyon.

Wengine kutoka African Lyon ambayo imeshuka daraja ni washambuliaji Omary Daga na Venance Ludovic.

Kagera Sugar hawakuishia hapo, wamebisha hodi Mtibwa Sugar na kumtwaa mshambuliaji Japhary Kibaya. Mlinda mlango mahiri kutoka JKT Ruvu, Said Kipao nae ameelekea kwa wanankurukumbi akitia saini kandarasi ya miaka miwili.