LIPULI WAING'ANG'ANIA YANGA UHURU

Ligi kuu ya Vodacom Tanzania bara ambayo ilianza jana, imeendelea leo katika uwanja wa uhuru jijini Dar es Salaam ambapo Yanga walikua wenyeji wa Lipuli FC ambao wamepanda daraja msimu huu.

Katika mchezo huo, Lipuli wamefanikiwa kuwakomalia vilivyo Yanga ambao ni mabingwa watetezi wa ligi hiyo kwa kuwalazimisha sare ya bao 1-1 katika mchezo ambao ulikua mkali na wa kusisimua.

Lipuli ndiyo waliokua wa kwanza kupata bao katika dakika ya 45, likiwekwa kimiani na mshambuliaji Seif Karihe baada ya kupokea pasi safi kutoka kwa Malimi Busungu na kufyatua shuti kali lililomshinda golikipa wa Yanga YouthRostand.

Yanga walisawazisha bao hilo dakika mbili baadae kupitia Donald Ngoma ambaye alifunga kwa kichwa akiunganisha mpira wa kona na mpira kugonga mwamba wa juu kisha ukatua dani ya eneo la lango la Lipuli pasipo kutikisa wavu.

Kipindi cha pili kilikua cha piga nikupige. Yanga wakishambulia kwa uchu na kasi, lakini hadi dakika 90 zinamalizika, timu hizo ziligawana alama moja moja.

Nahodha wa Lipuli, Asante Kwasi hakumaliza mchezo huo baada ya kuzawadiwa kadi nyekundu katika dakika za lala salama.