SIMBA HOI KAGERA, YALIZWA NA WACHEZAJI ILIYOWAKUZA

Mbio za ubingwa kwa wekundu wa Msimbazi Simba zimeingia katika changamoto nyingine baada ya kupoteza mchezo wake muhimu leo dhidi ya Kagera Sugar ikifungwa bao 2-1.

Kagera Sugar iliyokua katika ubora wake leo ilipata bao la kwanza dakika ya 27 kwa shuti kali toka nje ya 18 likifungwa na Mbaraka Yusuph bao ambalo lilidumu mpaka mapumziko.

Kipindi cha pili iliwachukua dakika 1 tu Kagera sugar kupata bao la pili safari hii likifungwa na Mchezaji wa zamani wa Simba na timu ya taifa Edward Christopher baada ya uzembe wa mabeki wa Simba.

Dakika ya 62 Simba walipata bao la kufutia machozi baada ya kazi nzuri iliyofanywa na James Kotei ambaye leo alicheza kama beki namba 2 kupiga pasi iliyounganishwa na Juma Luizio na kupanguliwa na  kipa wa Kagera Juma Kaseja kabla ya Mzamiru Yasin hajamalizia na kuandika bao hilo.

Kwa matokeo hayo Sasa Simba inabaki katika nafasi ya pili ikiwa nyuma kwa pointi moja dhidi ya Yanga wanaoongoza wakiwa na pointi 56.