ROMA YAIPUMULIA JUVENTUS UBINGWA SERIE A

Baada ya kuondoshwa katika michuano ya Europa League AS Roma lengo lao kuu sasa limebaki katika kuwania ubingwa wa ligi kuu ya Italia Serie A.

Jana usiku ikiwa ugenini iliweza kuikandamiza Pescara bao 4-1 katika mchezo uliotawaliwa zaidi na wageni ambao walionekana wana lengo moja tu kuchukua pointi 3.

Kiungo wa kimataifa wa Uholanzi Kevin Strootman alitangulia kuipatia Roma bao la kwanza dakika moja kabla ya mapumziko na wakati Pescara wakitafakari walivyofungwa wakajikuta wanafungwa bao la pili sekunde kadhaa kabla ya mapumziko safari hii likifungwa na Radja Nainggolan na kufanya Roma kwenda mapumziko wakiwa mbele kwa bao 2-0.

Kipindi cha pili kilikua ni mwendelezo wa pale walipoishia Mohammed Salah akifunga bao mbili dakika ya 48 na 60 kabla ya Ahmad Benali kuipatia Pescara bao la kufutia machozi dakika ya 83.

Kwa matokeo hayo Roma wamefikisha pointi 75 katika nafasi ya pili katika ligi inayoongozwa na Juventus wakiwa na pointi 83 nafasi ya 3 ikishikwa na Napoli wenye pointi 71.