SERENGETI BOYS WAIHENYESHA BURUNDI KAITABA

Timu ya soka ya taifa ya Tanzania ya vijana wenye umri chini ya miaka 17, Serengeti Boys inayojiandaa na michuano ya mataifa ya Afrika kwa vijana wa umri huo itakayofanyika huko Gabon mwezi Mei mwaka huu, leo imecheza mchezo wa kujipima ubavu dhidi ya Burundi.

Katika mchezo huo uliopigwa katika uwanja wa Kaitaba mjini Bukoba katika mkoa wa Kagera, Serengeti Boys wamefanikiwa kuibuka na ushindi wa mabao 3-0 dhidi ya vijana hao wa Intamba Murugamba.

Wakicheza soka la uhakika, Boys waliandika bao la kwanza katika dakika ya 20 ya mchezo likifungwa na Muhsin Makame akisindikiza pasi pasi safi kutoka kwa Calvin Naftali.

Mlinzi wa kushoto Nickson Kibabage aliandika bao la pili katika dakika ya 39 baada ya kuwachambua walinzi wa Intamba na kuachia shuti kali lililomshinda mlinda mlango.

Mpaka kipindi cha kwanza kinamalizika, Serengeti Boys walikua mbele kwa mabao 2-0 huku Burundi wakiwa hawajaandikisha shuti lolote lililolenga lango la Tanzania.

Kipindi cha pili kilianza kwa mashambulinzi ya hapa na pale huku Burundi wakijaribu kuchangamka katika eneo la katikati ya kiwanja lakini utulivu wa viungo wa Serengeti Boys wakiongozwa na Aly Ng'anzi uliwafanya vijana wa Burundi kushindwa kabisa kumfikia golikipa wa Tanzania, Ramadhan Kabwili.

Mnamo dakika ya 72, Serengeti Boys walipata penati baada ya mlinzi wa Intamba Murugamba kuunawa mpira uliopigwa na Nickson Kibabage katika eneo la hatari. Penati ilipigwa na kukwamishwa kimiani na Yohana Mkomola na kuiandikia Tanzania bao la 3.

Mpaka mchezo unamalizika, ni Serengeti Boys walioibuka na ushindi, wakiendeleza walipoishia kaka zao Taifa Stars ambao ndani ya juma hili waliifunga Intamba Murugamba ya wakubwa mabao 2-1.

Baada ya mchezo wa leo, timu hizo zitarudiana tena April mosi katika uwanja wa Kaitaba.