SIMBA WAKUTANA NA KICHAPO CHA KWANZA CHA MSIMU

African Lyon imekua timu ya kwanza kupata ushindi mbele ya Simba msimu huu katika uwanja wa Uhuru jijini Dar es Salaam.


Simba walionekana kuutawala mchezo kwa kiasi kikubwa lakini vijana wa African Lyon walionesha nidhamu ya hali ya juu sana hasa katika eneo lao la ulinzi.

Simba wakionekana kuhaha kutafuta bao la ushindi kwa dakika zote za mchezo walipambana na upinzani mkali kutoka kwa African Lyon ambao walionekana dhahiri kutafuta walau matokeo ya sare wakitumia muda mwingi hasa kipindi cha pili kuchelewesha mambo.

Katika dakika za majeruhi, winga Rehani Kibingu aliambaa ambaa na mpira katika upande qa kulia kabla ya kunyunyiza krosi safi iliyotumiwa vizuri na Abdul Msuhi kuandika bao la ushindi.

Mpaka kipyenga cha mwisho kinasikika, African Lyon 1-0 Simba.
Matokeo hayo yameipunguzia kasi Simba ambapo sasa watabaki na pointi zao 35 wakiwazidi wapinzani wao Yanga kwa pointi 5.

Huu ulikua ni mchezo wa 14 wa Simba msimu huu, ambapo walifanikiwa kucheza michezo 13 bila kupoteza mchezo wowote, rekodi ambayo imevurugwa na African Lyon leo hii.