MEMPHIS DEPAY: TATIZO NI NAMBA 7 NA KUPAKWA "WANJA KABLA YA KUWA MWANAMWALI"

Wazee wetu walijawa na hekima na busara nyingi mno hapo zamani ilikuwa ngumu sana kukutana na binti kajipodoa hata kabla hajavunja ungo na kupishana nae mitaani kilikuwa kitu aghalabu kutokea katika jamii zao walizoishi,wakati wao ukapita na sasa jambo hilo ni la kawaida tu kukutana hata na binti wa miaka 10 tena akiwa amejipamba mwenyewe achilia kupambwa...jambo hili linanifanya nilinasibishe na usajili wa mholanzi Memphis Depay katika klabu ya Manchester United, msimu wake wa mwisho akiwa na klabu yake iliyomlea ya PSV alikuwa ni moja kati ya wachezaji vijana waliofanya vizuri sana msimu wa 2014/15 akifunga jumla ya goli 26 katika mashindano yote na hata usajili wake haukushagaza sana watu wala kuhojiwa kwanini amesajiliwa kama ule wa Anthony Martial..ambao hawakubahatika kumuona walitembelea YouTube na kuangalia video zake kila mtu alikuwa na jibu lake moyoni huku wengine wakianza kumfananisha na mfalme mmoja wa kireno aliyepita pale OT miaka michache iliyopita na mtu wa mwisho kabisa kuvaa jezi pendwa na maarufu namba '7' na kuitendea haki vile watu walivyotarajia...kwa baadhi ya watu kwao alishakuwa Ronaldo mpya hata kabla hajakanyaga nyasi za OT hapa ndipo mashabiki tunapokosea kusifia utamu wa tunda hata kabla hujalitia mdomoni au kusifia tu hata kama tunda lenyewe ni chungu,mwenzie Martial kaja kimya kimya hata walioponda bei yake amewaacha na bumbuwazi kwa kiwango chake ndani ya uwanja huku bishoo Memphis akifanya vizuri nje ya uwanja na kuiona dunia ipo katika miguu huku akidhani yeye tayari ni nyota mkubwa wa soka duniani kwa kuwa yupo Manchester United

Napata tabu sana kumfananisha na Ronaldo ambaye kwenye vyumba vya kubadilishia nguo alipishana na mtemi,kiongozi mpambanaji Roy Keane, kina Paul Scholes,Ryan Giggs,Gary Neville na baadae kina Vidic,Rio na wengineo wengi tu.. timu zote hizo zilikuwa na mihimili kila sehemu ila huyu Memphis ameikuta United yenye kiu mno na mafanikio halafu amepewa jezi namba 7 ambayo Antonio Valencia aliibadili bila hata kuombwa baada ya kuitumia kwa msimu mmoja tu na mbaya zaidi huyu dogo usajili wake ulitizamwa kwa jicho la 3 kwa kuwekewa matumaini makubwa mno na ndicho hasa kinachomtesa na kutamani kufanya chochote tu ilimradi awaridhishe mashabiki lakini hapo hapo anasahau hachezi tena eridivisie ligi ambayo unaweza pata hata sekunde 30 za kufikiria mpira unaupeleka wapi..mwenzie aliikuta timu ina mifano mingi ya kuiga na aliyakuta mafanikio akaishi nayo akapata na ya kwake binafsi huku akiwa mchezaji asiyepita kwenye kioo bila kujiangalia...Depay yeye usajili wake ni kuwa mchezaji tegemeo moja kwa moja kwenye timu huku jina lake akilitengeneza PSV naufananisha na usajili wake na ule wa Hazard wakati anatoka Lille kwenda Chelsea

Ile namba aliyopewa kwake ni sawa na kuwekewa moto katika kiganja cha mkono au kubebeshwa mzigo wa misumari kichwani wengi imewashinda akiwemo nyota wa Argentina Angel Di Maria aliyekuja kwa mbwembwe nyingi kwa kuvunja rekodi ya uhamisho ya nchini uingereza na kuishia kucheza msimu mmoja tu na kuondoka zake, tatizo la ile namba ikiwa nyuma ya mgongo mashabiki wanataka kuona vitu vya George Best,Ronaldo au Cantona hawajali hata kama timu ipo katika wakati mgumu kiasi gani watakuona wewe ndio mkombozi wao na hapa ndipo bishoo Depay anapopata tabu kwa kuwa alishapakwa wanja kabla basi anaamini tayari kashapevuka,kumbe bado ana safari ndefu iliyowashinda wengi kufikia viwango vya walioifanya ile namba kuwa maarufu pale OT na duniani kwa ujumla.

Umri wake unamruhusu kuyafanya yale anayofanya uwanjani lakini kwa United hii ambayo matokeo kuyapata ni shida hakuna atakayemvumilia, LVG alijaribu lakini na mwenyewe yamemshinda sasa dogo anakula mkeka tu..Depay ana vitu vingi vizuri kwenye miguu yake inawezekana United imekuja mapema mno kwake hasa ikiwa katika wakati mbaya ambao inahitaji watu wa kuwapa matokeo kwanza sio wa kupaka rangi kama kesi ya KDB alivyokuwa Chelsea  mpaka kufikia safari ya kuwa moja ya viungo washambuliaji hatari kwa sasa..nina imani hana safari ndefu ya kutungiwa nyimbo na mashabiki wa united ikiwa atatambua miguu yake inahitaji kuongea sasa na kucheza kama Depay huku akijisahaulisha ile namba aliyovaa mgongoni ambayo ni maarufu na ni nzito kushinda jina lake iliyoachwa na kipepeo Angel Di Maria..mwanzo mgumu ila atafika tu ikiwa atatambua nini kipo katika miguu yake.

Zahir Bilali
0712436593