UBINGWA TANZANIA BARA 99.9%% KWA YANGA: YAIPIGA RUVU MKONO

Simon Msuva

Na: Edo Daniel Chibo

Wawakilishi pekee wa Tanzania katika michuano ya kimataifa Yanga SC leo wameongeza nafasi ya kuchukua ubingwa wa Tanzania bara baada ya kuwabamiza bila Huruma Ruvu Shooting ya Pwani bao 5-0

Katika mchezo huo uliopigwa katika dimba la Taifa Jijini Dar Es Salaam na kuchezeshwa na mwamuzi Isihaka Shirikisho ilishuhudiwa Yanga ikipata ushindi huo mnono ikiwa ni siku chache baada ya kuwafunga Coastal Union bao 8-0.

Yanga ambayo inanolewa na kocha Mholanzi, Hans
va der Pluijm imebakiza mchezo mmoja tu ambao itahitaji ushindi ili kutawazwa mabingwa wapya kwani leo wamefikisha pointi sasa 52, baada ya kucheza mechi 23 na kama itashinda mechi ijayo basi itafikisha pointi 55 ambazo haziwezi kufikiwa na timu yoyote katika ligi kuu.

Simon Msuva wa Yanga alizidi kuonyesha nia ya kukitaka kiatu cha mfungaji bora wa ligi msimu huu kwa kufunga mabao mawili ambayo yanazidi kumweka kileleni mwa wafungaji bora katika ligi msimu huu kwa kufikisha mabao 16.

Kpah Sherman alifunga pia mabao mawili huku Amis Tambwe akipachika bao moja na kuhitimisha idadi ya mabao matano kwa Yanga ambao wanajiandaa na mechi yao ya marudiano wiki ijayo dhidi ya Etoile du Sahel ya Tunisia katika kombe la Shirikisho barani Afrika.

+++++++++++++++++++++