SIMBA YAFANYA MAUAJI KWA MGAMBO. OKWI AONDOKA NA MPIRA

Na: Edo Daniel Chibo

Mabingwa wa kombe la Mapinduzi Simba SC jioni hii wamefanya mauaji ya aina yake baada ya kuwabamiza Mgambo JKT toka Tanga kwa bao 4-0.

Mshambuliaji wa Simba Emmanuel Okwi alikua mwiba mchungu kwa Mgambo siku ya leo baada ya kufunga magoli matatu kati ya magoli hayo manne na kumwezesha kufunga hat trick yake ya kwanza akiwa na klabu ya Simba licha ya kufunga mara kadhaa lakini hakuwahi kufunga magoli matatu katika mechi moja.

Makosa ya mabeki wa Mgambo JKT yalikua faida kwa Simba baada ya kuwaruhusu washambuliaji wa Simba kufanya wanachotaka na kama Emmanuel Okwi,Ibrahim Ajib na Ramadhani Singano wangekua makini basi karamu ya magoli ingeongezeka kwa Simba.

Goli lingine la Simba lilifungwa na Ramadhani Singano Messi na kuifanya Simba kupata pointi 3 muhimu ambazo zinaifanya kufikisha pointi 38 katika nafasi ya 3.

Katika mechi nyingine Polisi Morogoro imeangukia pua baada ya kulazimishwa sare ya bila kufungana na Coastal Union katika uwanja wa Jamhuri mjini Morogoro matokeo ambayo yanazidi kuwadidimiza Polisi katika balaa la kushuka daraja.