ALICHOSEMA OKWI KUHUSU MSHABIKI WA YANGA

 Na Allen Kaijage

Baada ya mechi ya Simba na Coastal Union nilifanikiwa kuongea na Okwi kwa upande wa Simba na Rama Salim kwa upande wa Coastal. Emmanuel Okwi alihusika kwenye magoli yote ya Simba, kama ilivyo kwa Rama Salim naye alihusika kwenye magoli yote ya Coastal union kwa kupika goli moja na kufunga lingine.

Mahojiano na Rama Salim

Nilianza mahojiano yangu na Rama Salim mchezaji wa zamani wa Gor mahia ya Kenya ambaye mwaka 2011 alikua mchezaji bora chipukizi wa ligi kuu ya Kenya almaarufu KPL.

 Mahojiano yangu na RAMA SALIM yalikua kama ifuatavyo:

Mwandishi: Rama hongera kwa kazi nzuri uliyoifanya leo.

RAMA: Ahsante sana.

Mwandishi Kaijage akiwa na Rama Salim

Mwandishi: Rama kipindi cha kwanza  hamkucheza vyema, unadhani ni kwanini?

RAMA: Ujue Simba ni timu kubwa, kipindi cha kwanza tulikua na ‘Tension’ ila kadiri mchezo ulivyokua unaendelea na ujasiri  ulikua unaongezeka.

Mwandishi: Nini kiliwafanya mbadilike kipindi cha pili?

RAMA: Maneno ya kocha baada ya kipindi cha kwanza kumalizika.

Mwandishi: Umejipangaje kwenye mechi zijazo?

RAMA: Nitajitahidi kufanya vizuri zaidi.

Mwandishi: Ahsante na kazi njema

RAMA: Kazi njema na wewe.

Mahojiano na Emmanuel Okwi

Baada ya mahojiano na Rama nilikaa dakika kadhaa kumsubiri Okwi aliyekuwa kwenye vyumba vya kubadilishia nguo.  Emmanuel Okwi akatoka huku akiwa anaonekana mwenye haraka, Ilibidi na mimi niongeze kasi ili nipate mawili matatu kutoka kwake.

Mwandishi: Habari ndugu Okwi?

Okwi: salama kaka.

Mwandishi: Okwi unazungumziaje  kiwango chako na cha timu kwa ujumla.

Okwi: Mara nyingi sipendi kuzungumzia kiwango changu binafsi kuliko cha timu. Tulicheza vizuri kipindi cha kwanza na Coastal walicheza vizuri kipindi cha pili.

Mwandishi: Kama mchezaji utafanya nini ili mechi ijayo timu yako ipate Ushindi

Okwi :Ujue sijafurahia sana kiwango nilichoonesha leo, nitajitahidi kuongeza mazoezi ili mechi ijayo niisaidie timu yangu kupata ushindi.

Mwandishi: Unajisikiaje kwa kitendo cha mashabiki wa Yanga kukuzomea kila unapogusa mpira?

Okwi: Sina muda nao, mimi sasa ni mchezaji wa simba, mambo yote kuhusiana na yanga hayanihusu.