SPORTPESA YAKANUSHA WAKINA KAHEZA KUTOSHIRIKI SUPER CUP

Kampuni ya michezo kubahatisha ya SportPesa imekanusha taarifa kuwa wachezaji wapya wanaosajiliwa kipindi hiki kuwa hawatashiriki michuano ya Super Cup itakayoanza wiki ijayo nchini Kenya.

Klabu ya Simba imemjumuisha kikosini mshambuliaji wao mpya Marcel Kaheza waliomsajili kutoka Majimaji kwa ajili ya michuano hiyo.

Jana kulitoka taarifa katika mitandao mbalimbali ya kijamii kuwa wachezaji wapya watakao sajiliwa kipindi hiki hawataruhusiwa kushiriki michuano hiyo.

Afisa uhusiano wa SportPesa, Sabrina Msuya amekanusha taarifa hizo na kusema wachezaji wote watakao sajiliwa  wataruhusiwa kushiriki mashindano hayo.

"Taarifa hizo hazina ukweli wowote hakuna wachezaji watakao zuiwa kushiriki michuano hiyo hata kama ndio wamesajiliwa kipindi hiki," alisema Sabrina.

Michuano hiyo itashirikisha timu nane ambapo kwa upande wa Tanzania itawakilishwa na Simba, Yanga, Singida United na JKU kutoka visiwani Zanzibar.