SIMBA YAFANYA MAUAJI YA KUTISHA UWANJA WA UHURU, OKWI AONDOKA NA MPIRA

Ligi kuu ya Vodacom Tanzania bara imeanza kutimua vumbi katika viwanja kadhaa nchini huku dhahma ikiwaangukia Ruvu Shooting katika uwanja wa Uhuru jijini Dar es Salaam baada ya kungushiwa mvua ya magoli 7-0 kutoka kwa wekundu wa Msimbazi, Simba.

Mshambuliaji Mganda, Emmanuel Okwi alikua nyota wa mchezo huo, akiweka kimiani mabao manne peke yake huku akiweka rekodi ya kufunga hat trick ya kwanza katika ligi kuu msimu mpya wa 2017/18.

Mabao mengine ya Simba leo yalifungwa na Shiza Kichuya, Juma Liuzio na Erasto Nyoni.

Huko Nangwana Sijaona, Mtwara Azam FC walikua wageni wa Ndanda FC na Azam wameibuka na ushindi muhimu wa bao 1-0.

Huko Mwadui Shinyanga nako kulikua na mchezo kati ya wenyeji Mwadui FC dhidi ya wageni wa ligi Singida UTD. Mchezo huo ulishuhudiwa Singida wakikaribishwa vyema kwa kufungwa mabao 2-1.

Katika uwanja wa Kaitaba mjini Bukoba, wana nkurukumbi Kagera Sugar wakiwa nyumbani wameshangazwa kwa kichapo cha bao 1-0 kutoka kwa Mbao FC ya mwanza.

Katika mashamba ya miwa huko manungu, Mtibwa Sugar walikua dimbani wakiwaalika wapiga debe wa Shinyanga, Stand United katika mchezo ambao Mtibwa wameibuka na ushindi wa bao 1-0.

Katika uwanja wa Sabasaba Mjini Njombe Tanzania Prisons walikua wageni wa Njombe Mji na Tanzania Prisons wameibuka na ushindi wa mabao 2-0.

Mbeya City ikiwa nyumbani Sokoine imeinyuka Majimaji bao 1-0 mchezo ulioonekana kuwa mkali muda wote.

Ligi hiyo itaendelea kesho Jumapili katika uwanja wa uhuru jijini Dar es Salaam kwa mabingwa watetezi Yanga kuwaalika wageni Lipuli FC kutoka Iringa