MAMIA WAMUAGA SHOSE DAR ES SALAAM,KUZIKWA KESHO MOSHI

Mamia ya Mashabiki wa soka waliungana leo katika kanisa Katoliki la Watakatifu Mashahidi wa Uganda Magomeni jijini Dar es Salaam kumuaga shabiki mkubwa wa Simba na Manchester United na mwanachama wa taasisi ya Wapenda Soka Tanzania ambao ni wamiliki wa mtandao huu Shose Fidelis.

Uongozi wote wa klabu ya Simba wakiongozwa na Rais wa klabu hiyo Evans Aveva na makamu wake Godfrey Nyange Kaburu walijitokeza kumuaga Shose ambaye mpaka mauti yanamkuta alikua akitoka kuishangilia klabu ya Simba kule Dodoma na kupata ajali ya gari.

Jonas Mkude na Rafiki mkubwa wa Marehemu Shose aitwaye Jasmine ambao walikuwa pamoja wakati ajali hiyo inatokea nao walikuwa kati ya watu waliojitokeza kumuaga Shose kanisani hapo.

Akizungumza na www.wapendasoka.com Rais wa Simba Evans Aveva alisema “Familia ya soka, wadau na Simba imepata pigo kutokana na kifo cha Shose, sisi kama Simba tumempoteza mtu shupavu ambaye alikuwa akifanya mambo mengi mazuri kwa ajili ya klabu.”

Msafara wa Kumpeleka Shose uko njiani sasa ukielekea Moshi Mkoani Kilimanjaro ambako kesho Ijumaa watampumzisha kwenye makazi yake ya milele.

UNTIL WE MEET AGAIN REST IN PEACE SHOSE.