FAINALI KOMBE LA FA TANZANIA ; SIMBA NA MBAO WANAWANIA MILIONI 50 DODOMA LEO

Leo Jumamosi, Mei 27 mwaka huu Simba SC ya Dar es Salaam na Mbao FC ya Mwanza zitakutana Uwanja wa Jamhuri mjini Dodoma kwenye fainali za kuwania Kombe la Shirikisho la Azam yaani Azam Sports Federation Cup - ASFC 2016/17 Au kombe la FA katika mchezo utakaoanza saa 10.00 jioni.

Mbao timu ngeni katika ligi kuu soka Tanzania bara imeonyesha maajabu msimu huu baada ya kufanikiwa kuzisumbua timu kubwa akiwemo bingwa Mtetezi Yanga na leo watakua na jukumu moja tu la kuweza kuweka rekodi ya kutinga katika michuano ya kimataifa kwa mara ya kwanza ikiwa ni timu ngeni.

Mechi ya leo pia ni nafasi kwa Simba kurudi katika michuano ya kimataifa baada ya kukosa nafasi hiyo kwa misimu kadhaa sasa.

Katika Ligi kuu Msimu huu Simba imeweza kuibuka na ushindi katika mechi zote mbili dhidi ya Mbao ikiwa ni pamoja na ushindi maarufu wa bao 3-2 walioupata Simba katika mechi iliyofanyika jijini Mwanza.

Kadhalika kwa mujibu wa Kanuni ya 6 (2), Mshindi wa mchezo wa fainali (Kwa msimu huu kati ya Simba na Mbao), ndiye akayekuwa Bingwa wa Kombe la ASFC - HD, atapewa Kombe la Ubingwa na zawadi ya fedha kiasi cha shilingi milioni hamisini (50,000,000/-) kama zilivyoainishwa kwenye waraka wa zawadi kwa washindi.