KASHFA : BARCELONA B KUMBE ILIPANGA MATOKEO YA USHINDI WA 12-0. KOCHA ASHIKILIWA NA POLISI

Kocha wa timu ya Eldense inayoshiriki ligi daraja la pili Nchini Spain maarufu kama Segunda Devision B bwana Filippo di Pierro amekamatwa na polisi kwa kosa la Rushwa katika soka.

Eldense ilifungwa bao 12-0 na Kikosi cha vijana cha klabu ya Barcelona yani Barcelona B katika mechi ya ligi hiyo siku ya Jumamosi.

Polisi wa nchini Spain wanasema wamemkamata kocha huyo raia wa Italia kujibu mashitaka ya kupanga hujuma katika mechi hiyo.

Siku ya Jumapili mmoja wa wachezaji wa Eldense raia wa Maurtania Cheikh Saad ambaye hakucheza siku ya Jumamosi aliiambia radio RAC1 kuwa kuna wachezaji wanne wanahusika kupanga matokeo kutoka katika kikosi chao.

Mchezaji huyo alisema yuko tayari kutaja majina ya wachezaji waliopangwa kupindisha matokeo katika mechi hiyo na yeye akaambiwa kabisa kuwa mechi hiyo ilikua imepangwa hivyo kama anataka kucheza awe tayari kutofunga goli lolote.

Baada ya mechi hiyo Eldense iliteremka daraja rasmi na ikatangaza kwamba haitocheza mechi 6 zilizobaki.