YANGA YAIADHIBU BILA HURUMA SIMBA

Mabingwa watetezi wa Ligi kuu Tanzania Bara Yanga SC leo imefuta uteja wa kufungwa na watani zao Simba kwa bao 2-0.

Mchezo huo wa ligi kuu Nchini Tanzania ulipigwa katika dimba la Taifa jijini Dar Es Salaam lilishuhudiwa na mashabiki lukuki waliokaribia kuujaza uwanja huo wenye uwezo wa kubeba mashabiki 60,000.

Simba walianza kwa kasi na kumiliki vilivyo mpira huku washambuliaji wake Mussa Hassan Mgosi na Hamis Kiiza wakikosa nafasi nyingi.

Kocha wa Yanga alifanya mabadiliko kipindi hicho hicho cha kwanza kwa kumtoa Simon Msuva na nafasi yake kuchukuliwa na Malimi Busungu ambaye alitengeneza goli la kwanza lililofungwa na Amiss Tambwe dakika ya 44.

Kipindi cha pili wakati Simba wanatafuta bao walijikuta wakifungwa bao la pili baada ya safu ya ulinzi kushindwa kuokoa mpira uliorushwa naMbuyu Twite na kumkuta Busungu aliyepiga kichwa na kujaa wavuni.

Mpaka mwisho wa mchezo Yanga 2 Simba 0.