MAN UNITED VS WIGAN ~ USHINDI PEKEE NDIYO UTARAHISISHA MAISHA YA MOYES OLD TRAFFORD

Kitu ambacho Wapenda Soka leo watasubiri kuona ni Nini atafanya kocha mpya wa mabingwa wa England klabu ya manchester United David Moyes watakapoingia katika dimba la Wembley kuwania Ngao ya Jamii dhidi ya mabingwa wa Kombe la FA klabu ya Wigan Athletics ikiwa ni Ufunguzi wa msimu mpya wa Ligi nchini England. Ni ushindi pekee ndiyo unaweza kurahisisha maisha ya kocha David Moyes baada ya kutosajili mpaka sasa huku akifanya vibaya katika ziara ya mechi za kirafiki kujiandaa na ligi.

Man United wanaingia uwanjani leo ikiwa ni siku chache tu kabla ya kuikabili Swansea City katika mechi ya kwanza katika ligi kuu England huku Wigan walioshuka daraja wameshaanza vizuri msimu mpya wa Ligi ya Championship kwa kuilaza Barnsley 4-0.

Wigan si timu ya kubeza kwani waliweza kuchukua kombe la FA kwa kuwafunga Manchester City msimu uliopita katika fainali ya kombe la FA hapo hapo katika uwanja wa Wembley. Wigan imeshuka daraja msimu huu lakini imekua na kikosi bora baada ya kumwongeza Grant Holt ambaye alikua mkali wa mabao wa klabu ya Norwich. Owen Coyle ndo ameteuliwa kuiongoza Wigan Msimu huu akichukua mikoba ya Roberto Martinez aliyetimkia Everton kuchukua nafasi iliyoachwa na David Moyes anayeifundisha Man United sasa.

Man United wanaingia katika mechi ya leo wakitoka katika kichapo cha 3-1 kutoka kwa Sevilla jumamosi Usiku wakati wa mechi ya heshima kwa beki wa timu hiyo Rio Ferdinand. Man United inaingia katika mechi ya Leo ikiwa na Kocha mpya David Moyes ambaye anachukua nafasi iliyoachwa wazi na kocha aliyestaafu Sir Alex Ferguson.
Mara ya Mwisho Man United Kucheza katika mechi ya mashindano bila kocha Sir Alex Ferguson, David Moyes alikua akiichezea Bristol City wakati huo kipa David De Gea, Phill Jones,John Evans,Tom Cleverley, Fabio na pacha wake Rafael walikua hawajazaliwa.

Mechi ya leo ya Ngao ya jamii ni mechi ya 91 kuanzia ilipoanzishwa na bingwa wa mechi ya leo atakua amechukua ngao hiyo mara ya 91. Na hii ni mara ya kwanza tangu mwaka 1980 kuona timu iliyo daraja la kwanza ikicheza dhidi ya ile ya ligi kuu katika ngao ya Jamii

Hii ni mara ya kwanza katika historia kwa klabu ya Wigan kucheza mechi ya ngao ya jamii na kwa upande wa United hii kama watachukua mara hii itakua mara yao ya 20 kubeba ngao ya jamii sawa na ubingwa wa mara 20 walioupata msimu uliopita.
Katika mechi 17 kati ya timu hizo Wigan imeshinda mechi moja tu huku Man United ikishinda mechi 16 na hakuna droo. Wigan ikifunga magoli matano wakati United imeifunga Wigan magoli 54 katika mechi hizo 17.

Manchester United inashikilia rekodi ya kua timu pekee kuibuka na ushindi mkubwa katika mechi za ngao ya jamii baada ya kuwahi kuifunga Swindon Town magoli 8-4 katika mechi iliyopigwa mwaka 1911.

..... Je Nini kitatokea? Tusubiri kuona